Ekde la unua de majo de 2003, Chinio permesas al fremdlandaj investantoj sin okupi pri podetala vendado de libroj, jhurnaloj kaj gazetoj en Chinio. Tio markas, ke la merkato de podetala vendado de libroj, jhurnaloj kaj gazetoj laupashe malfermighos al la membrolandoj de la Monda Komerca Organizo. Koncerna regulo difinas, ke fremdlanda investado por libroj, jhurnaloj kaj gazetoj estos praktikata en du pashoj.

    En la unua de majo Chinio donis permeson al fremdlandaj investantoj establi entreprenon de podetala vendado. Lau la regulo fremdlanda investanto por podetala entrepreno devas enregistri 5 milionojn da juanoj. Oni povas entrepreni post ratifiko de la Shtata Administracio pri Gazetaro kaj Eldonado.

    La regulo pri investado de fremdlanda kapitalo al entrepreno de pogranda vendado de libroj, jhurnaloj kaj gazetoj ekvalidos de la unua de decembro de 2004.

    Statistiko de koncerna departemento raportis, ke nun en Chinio estas pli ol 10 mil shtataj librovendejoj kaj 36 mil kolektivaj kaj individuaj librovendejoj. Sed la pokapa posedkvanto de libroj de la chinoj estas malmulta, kaj ekzistas problemoj en servado, administrado kaj distribuado de libroj. Malfermo de merkato de libroj, jhurnaloj kaj gazetoj al alilandanoj stimulos la disvolvighon de la gazetara kaj eldona afero de Chinio, altigos servokvaliton, kompletigos administran sistemon kaj rapidigos samtaktighon de la china gazetara kaj eldona afero kun la internacia.