___________________________________________________________________________

 T E J O - A K T U A L E                        N-ro 137 (15 aprilo 2004)
___________________________________________________________________________

 Senpaga informletero de Tutmonda Esperantista Junulara Organizo
 <http://www.tejo.org>;
___________________________________________________________________________

1. IJK 2005 EN POLLANDO!!!
2. MALFERMA TAGO EN LA CENTRA OFICEJO
3. SEMINARIO EN SARAJEVO
4. NEJ VIN INVITAS AL PRITEMPA RENKONTIĜO 2004!
5. HELA ARANĜO EN POLLANDO
6. NE NEGLEKTU RE-ALIĜI AL TEJO!
7. NE PROSKRASTU ALIĜI AL LA 60-A IJK!
___________________________________________________________________________

1. IJK 2005 EN POLLANDO!!!

En sia lasta ret-estrarkunsido la TEJO-estraro decidis akcepti la proponon
de la polaj junaj esperantistoj inviti la IJK-on al Pollando en 2005. 
Unue, gratulon al niaj junaj polaj gesamideanoj! Kaj al ĉiuj ceteraj:
jam ekplanu por somero 2005--vi povos facile partopreni la UK-on en
Litvoio kaj poste iri al apuda Pollando por IJK!
___________________________________________________________________________

2. MALFERMA TAGO EN LA CENTRA OFICEJO

UEA kore invitas vin ĉiujn viziti la sidejon de UEA (ĉe Nieuwe Binnenweg
176)en Roterdamo sabaton la 24-an de aprilo (inter la 10:00 kaj 17:00) por
la printempa MALFERMA TAGO. Oficialaj prelgantoj estos Istvan ERTL kaj
Zofia BANET-FORNALOWA. Vi havos la okazon renkonti ankaŭ TEJO-volontulon
Joel AMIS kaj Ĝeneralan Sekretarion de TEJO Aleks KADAR. Kiel kutime 
vizitantoj ĝuos 10%-an rabaton en la libroservo kaj senpagajn kafon kaj
teon. Apartaj programeroj por gejunuloj estas planataj. 
___________________________________________________________________________

3. SEMINARIO EN SARAJEVO

En Sarajevo, Bosnio kaj Hercegovino, de la 22-a ĝis la 28-a de marto
okazis seminario de Esperanto@Interreto. Tridek naŭ partoprenantoj, el
16 landoj, partoprenis la seminarion, kiu temis pri interkultura lernado,
projekt-mastrumado, kaj instruado de Esperanto.  Je la fino de la semajno
diversaj laborgrupoj kiuj formiĝis dum la semajno prezentis siajn
projektojn, kaj la partoprenantoj jam ekplanis estontajn projektojn.
(informis Erin Piateski)
___________________________________________________________________________

4. NEJ VIN INVITAS AL PRITEMPA RENKONTIĜO 2004!

La Nederlanda Esperanto-Junularo (NEJ) ĝojplene invitas kaj bonvenigas
vin al sia Printempa Renkontiĝo 2004!! La PR 2004 okazos dum la ĉielira 
semajnfino de 19-05-04 ĝis 23-05-04 en s-Gravenzande (pron: sĥravezande)
en la provinco Zuid-Holland (Suda Holando) en la mez-okcidenta parto de
Nederlando. Plenaj informoj je <www.esperanto-jongeren.nl/pr2004>
___________________________________________________________________________

5. HELA ARANĜO EN POLLANDO

PEJ kaj Varsovia Vento kore invitas vin al HELA (Humura Esperantista Libera
Aranĝo--okazonta inter la 30-a de aprilo kaj 4-a de majo en urbeto Hel kaj 
sur duoninsulo Hel en norda POLLANDO).  Plenaj informoj je 
<http://republika.pl/viavento>;, aliĝilo je 
<http://rainbow.mimuw.edu.pl/~ts181294/hela/>;
___________________________________________________________________________

6. NE NEGLEKTU RE-ALIĜI AL TEJO!

Se vi ankoraŭ ne re-aliĝis al TEJO por 2004, bv. fari baldaŭ por ke via
ricevado de Kontakto kaj aliaj TEJO-eldonaĵoj ne estu prokrastita.  Ankaŭ
memoru ke via membreco en TEJO inkluzivas membrecon en UEA (kaj sekve 
voĉdonrajton)--kaj ĉi-somere okazos balotado kaj por la TEJO-Komitato kaj 
por la UEA-Komitato (kiu ja estos tre interesa balotado!). Ankaŭ 
memoru ke via TEJO-membreco donas al vi rabaton de la IJK-kotizo (ĉu vi 
jam aliĝis?). Retaj informoj kaj aliĝilo haveblas je <www.uea.org>;
<oficejo@tejo.org>
__________________________________________________________________________

7. NE PROSKRASTU ALIĜI AL LA 60-A IJK!

Ĉu vi jam aliĝis al la 60-a IJK okazonta en Kovrov, Rusio? Konsideru la
eblecon partopreni ankaŭ unu el la du antaŭkongresoj(en Sankt-Peterburgo
kaj Moskvo). Se vi bezonas invitleteron, NEPRE aliĝu antaŭ la 1-A DE
MAJO! Aliĝu ankaŭ vi al la jam pli ol 200 ĝisnunaj aliĝintoj!
Aliĝu je <www.tejo.org/ijk>
__________________________________________________________________________

TEJO-AKTUALE - Senpaga informletero de TEJO

 La ideo: <http://www.esperanto.org/tejo/publikajhoj/aktuale/koncepto.html>;.
 La arkivo: <http://www.tejo.org/tejo-aktuale>;.
 La aliĝo: <http://www.abonu.com/catalog/info.tejo>;
 Informojn kaj komentojn sendu al <aktuale-red@tejo.org>.
 La teamo de TEJO-aktuale estas:
 Jevgenij GAUS, Chuck SMITH, Joel AMIS.
 Tiun ĉi numeron redaktis Joel AMIS.