___________________________________________________________________________

 T E J O - A K T U A L E                        N-ro 130 (9 februaro 2004)
___________________________________________________________________________

 Senpaga informletero de Tutmonda Esperantista Junulara Organizo
 <http://www.tejo.org>;
___________________________________________________________________________

1. NOVA TEJO-VOLONTULO EN LA CO
2. 28-A IJF - MUZIKO KUNIGAS HOMOJN
3. POLA E-JUNULARO SURVOJE AL REAKTIVIĜO
4. ESPERANTO-FILMFESTIVALO EN ROTERDAMO
5. LINGVA PRISMO - POR LINGVEMULOJ
6. LA 36-A KOREA KONGRESO DE ESPERANTO
7. AKEL - ALTERNATIVA KOMUNIKADO INTER EŬROPAJ LERNEJOJ
___________________________________________________________________________

1. NOVA TEJO-VOLONTULO EN LA CO

TEJO ekhavis novan plentempan volontulon en la Centra Oficejo de Universala
Esperanto-Asocio kaj TEJO en Roterdamo (Nederlando). Lia nomo estas Joel
Amis kaj li venas el Usono. Vi eble jam konas lian nomon kaj vizaĝon de la
paĝoj de Kontakto (ĉar li estas ties Vic-redaktoro). Kontakti la
TEJO-volontulon daŭre eblas per la adreso <oficejo@tejo.org>. Ni kore
bonvenigas lin kaj tre dankas al la antaŭa volontulo Chuck Smith pro lia
bonega laboro dum 2003! 
___________________________________________________________________________

2. 28-A IJF - MUZIKO KUNIGAS HOMOJN

La 28-a Internacia Junulara Festivalo okazos en Abetone (Italio) de la 7-a
ĝis la 13-a de aprilo 2004, kaj oni parolos (ĉiel) pri muziko!  Ĝuu la
muzikan etoson kiu karakterizos la ĉi-jaran IJF-on!  Aliĝu nun ĉe
<http://iej.esperanto.it/iej/ijf/2004/alig.php>;
Nicola Ruggiero, gazetara ataŝeo IEJ, nicola.ruggiero@esperanto.it
___________________________________________________________________________

3. POLA E-JUNULARO SURVOJE AL REAKTIVIĜO

Dum malfermaj tagoj de Internacia Studumo pri Turismo kaj Kulturo en
Bydgoszcz inter 30.01-1.02 okazis kunveno de la polaj junaj esperantistoj.
En la renkontiĝo partoprenis membroj de Varsovia Vento kaj gestudentoj de
la Internacia Studumo. La provizora estraro serĉas kontaktojn kun la pola
junularo, do se vi estas juna (ĝis 30-jara), almenaŭ portempe loĝas en
Pollando kaj volas kunlabori, bonvolu aliĝi:
<http://groups.yahoo.com/group/pola_esperanto_junularo/>;.
Por ekscii la detalojn de la kunveno kaj la celojn de PEJ legu la raporton
de Irmina kaj Janusz ĉe: <http://republika.pl/viavento>;. 
___________________________________________________________________________

4. ESPERANTO-FILMFESTIVALO EN ROTERDAMO

La festivalo komenciĝos je la 12:00h, 14-an de februaro. Oni kunportu iom
da mono por la manĝoj. Ankaŭ se oni aĉetas pli ol 50 EUR da libroj, oni
povas ricevi 10% rabaton en la libroservo. Senpagaj kafo kaj teo. Venu al
la CO de UEA en Roterdamo. Por pli da informoj, skribu al
<oficejo@tejo.org>.
___________________________________________________________________________

5. LINGVA PRISMO

Lingva Prismo <www.lingvo.info> estas paĝaro kiu montras la buntecon kaj
la diversecon de la lingvoj de la mondo kaj invitas vin pensi pri la
gardado de tiu kultura ricaĵo. Tion ĝi faras en amuza maniero. Lingva
Prismo ekzistas diverslingve. Se vi volas kontribui al la kreskado de la
paĝaro kun tekstoj pri via lingvo aŭ traduki Lingvan Prismon al via
lingvo, bonvolu kontakti nin: <cornelia@lingvo.info>.
___________________________________________________________________________

6. LA 36-A KOREA KONGRESO DE ESPERANTO

Post unu semajno de la 89-a UK en Pekino, Korea Esperanto-Asocio okazigos
sian nacian kongreson de la 7-a ĝis la 8-a de aŭgusto. En la urbo Iksan,
for tri horojn trajne de Seulo. La kongresa temo estas 'Esperanto kaj
Religio'. Tiuj, kiuj havas intereson pri la kongreso kaj kongresa temo,
turnu sin al <esperant@unitel.co.kr> , prez. de KEA, LEE Jung-kee. 
___________________________________________________________________________

7. AKEL - ALTERNATIVA KOMUNIKADO INTER EUROPAJ LERNEJOJ

En la lernojaro 2003-2004 komenciĝis en kvar eŭropaj mezlernejoj
alternativa projekto por instrui E-on al lernejanoj, interŝanĝi la
spertojn kaj kontaktigi la komencontojn. Ili jam ekis kontakton kun
lernejoj en Portugalio, Hispanio, Pollando kaj Hungario. Ni atendas
kontaktojn el nunaj aŭ estonaj eŭropuniaj landoj por eniri la projekton.
Ni informos kiam la TTT-ejo estos preta. <luisladeira@netcabo.pt>.
___________________________________________________________________________

 TEJO-AKTUALE - Senpaga informletero de TEJO

 La ideo: <http://www.esperanto.org/tejo/publikajhoj/aktuale/koncepto.html>;.
 La arkivo: <http://www.tejo.org/tejo-aktuale>;.
 La aliĝo: <http://www.abonu.com/catalog/info.tejo>;
 Informojn kaj komentojn sendu al <aktuale-red@tejo.org>.
 La teamo de TEJO-aktuale estas:
 Jevgenij Gaus, Giuseppe Castelli, Chuck Smith.
 Tiun ĉi numeron redaktis Joel Amis, Chuck Smith.